Kulturarv som levande kraft – Sirdal fjellmuseum må få vekse

[Partiuka – Uke 44: Senterpartiet] I ei tid der mykje av politikken handlar om sentralisering og effektivisering, er det viktig å hugse at kultur ikkje berre er noko vi har – det er noko vi gjer. Kultur er levande fellesskap, forteljingar og identitet.

For oss i Sirdal handlar det om å ta vare på historia vår, og samstundes bruke ho til å skape framtid. Sirdal fjellmuseum er eit slikt kraftsenter. Her møtest natur, historie og menneske. Museet fortel historia om fjellbøndene, om stølsdrift, jakt, fiske og livet i heiane – alt det som har forma bygda vår. Det er ikkje berre eit museum, men ein inngangsportal til Heibergheiane, til kulturarven og til opplevingar som gjer Sirdal unik.

Senterpartiet meiner at kulturarv og lokal identitet er grunnmuren i levande lokalsamfunn. Vi vil satse på lokale museum, bygningsvern og kulturminne som gir folk stoltheit og tilhøyrsle. I vårt partiprogram står det tydeleg at musea skal få økonomiske rammer som gjer det mogleg å vidareutvikle utstillingar, formidling og vedlikehald av bygningar. Det handlar ikkje berre om pengar – det handlar om å ta ansvar for historia vår og gjere ho tilgjengeleg for nye generasjonar.

Sirdal fjellmuseum kan bli eit fyrtårn for heile regionen. Med betre finansiering, samarbeid med frivillige og lokale aktørar, og ei tydeleg satsing frå kommunen, kan museet utviklast til eit levande senter for kultur og læring. Det vil styrke både busetjing, turisme og lokal stoltheit. Sirdal fjellmuseum må vere ein levande plass med aktivitet. Difor har Sirdal SP fremma 1 årsverk til museum stilling i fleire år. I 2019 lagde ei nedsett gruppe frå kommunestyret, ein rapport om korleis vidareutvikle museet. Her føreslo ein både eit prosjekt kalle Drifteveien, og eit aktivitetsområde. Dessverre fekk ikkje dette medhald. 

Kulturpolitikk handlar ikkje om pynt – det handlar om folk, fellesskap og framtid. Når vi investerer i kultur, investerer vi i det som gjer oss til eit samfunn, ikkje berre ein kommune.

La oss derfor satse på Sirdal fjellmuseum – ikkje som eit minne frå fortida, men som ein motor for framtida.

• Satse på Sirdal fjellmuseum som inngangsport til Heibergheiane og som lokalt kultur- og reiselivssenter.

• Sikre langsiktige og forutsigbare rammer for lokale museum og kulturminne.

• Styrke frivilligheita og lokalt eigarskap i kulturarbeidet.

• Satse på bygningsvern, tradisjonsmat, handverk og lokal forteljarkultur som del av den immaterielle kulturarven.